Jumat, 14 Mei 2010

TUPA DO SASUDENA DIBAEN TUHAN JESUS

YOHANES 2:1-10

Bahat do tanda-tanda hahomangan/halongangan na nipatupa ni Tuhan Jesus dihatiha mangolu Ia di protibion. Jana tanda hahomangan na nibaen-Nia ima naparjolo ima Aek gabe Anggur, na nipatupa-Nia dihatiha adong pesta prkawinan di Kana di daerah Galilea. Laos di son ma Ia pataridahon bahaso diri-Nia ima salahak Mesias maradopkon halak nabahat i, khususna tu 6 halak anak sisean-Nia na rap dohot Ia hatiha i, dung i mur martamba ma haporsayaan ni halahi.


Mangelehen na lobi denggan dihatiha sada-sada pesta maradopkon angka tamu undangan pasti do silomo ni roha ni nambaen pesta. Harani i, sude do dipersiapkon dohot denggan jana angka nahombar tu pesta i pe (angka sipanganon dohot si inumon) biasana dipasingkop do sude, sesuai dohot bahat ni tamu na diundang. Bahkan biasana sipanganon dohot siinumon dipalobi do porsi na i sian bahat ni tamu na diundang, manjago anso ulang gabe hahurangan.

Suang songoni do na nipatupa ni sipambaen pesta perkawinan na di Kana, i ma na adong di turpuk on. Tapi hita ligi do di son, harupe madung diersiapkon sadenggan-dengganna laing tongtong dope hahurangan, khususna di siinumon, i ma anggur. Harani i ma gabe dipangidohon si Maria ina ni Jesus ma tu Anaknia I (Jesus) anso adong sada cara pasingkopkon anggur na hurang i. Boido muse dohonon, madung diboto si Maria do bahaso boido Jesus mambaen sada hahomangan. Tarida do i sian alus ni Jesus: “Aha do na dihagiotimu sian Au, inang ? Napodo dapot dope hatihangKu.” Alusni Jesus on sebenarna inda na giot menolak pangidoan ni Ina-Nia i, tapi marhite-hite alus-Nia on, Jesus giot patuduhon tu halahi dohot tu hita bahaso sude na giot tarjadi angkon sian lomo ni roha ni Ama-Nia dohot marhitehite parenta ni Ama-Nia, jana homin parenta ni Ama-Nia i do si oloan-Nia, i ma Debata Ama.

Tapi harupe songoni alusni Jesus tu Ina-Nia i, tongtong do dikarejohon Ia pangidoan i. Jana pasti madung jolo mangido kuaso do Jesus tu Ama-Nia. Harani i ma, gabe tulus ma pangidoan ni Ina-Nia i jana gok ma job ni roha dihalak na rot u pesta i, tarlumobi ma muse dinapatupahon pesta i, angke madung taruli jana singkop sude na denggan dipesta i.


  1. Sanga ahape na hita karejohon na denggan dibagasan ni ngolunta, angkon ma tongtong parsidohot Jesus hita baen.
  2. Dohot do Jesus mangadopi pesta i jana pasingkopkon naporlu tu pesta i. Bisa ma i hita artihon bahaso Jesus inda sipangorai diangka tradisi manang adat na dung somal tarjadi di tonga-tonga ni masyarakat Israel hatiha i, suang songon i ma muse lopus tu sannari on. Tapi ulang ma adat gabe na umporlu sian parhuria on. Harana bahat do halak sannari on maninggalkon ulaon parhuria on harani ulaon paradaton, dan bahkan adat jadi sumber hancit ni roha dohot angka parbadaan.
  3. Haroro ni Jesus tu pesta i mamboan si jop ni roha di sude halak, tarlumobi di napatupahon pesta i. Harani i, di sude ulaonta dohot parkarejoanta angkon tongtong ma hita undang Jesus, angkon tontong ma Ia parsidohot anso taruli angka na denggan dohot angka si jop ni roha.
  4. Haroro ni Jesus tu pesta I mamboan si jop ni roha di sude halak, suang songon i ma hita angkon tongtong siboan jop niroha di sude halak, sanga di dia pe hita jana sanga tu dia pe hita kehe. Ulang ma gabe halak panggunturi hita, ulang gabe sigora on hita manang sihagigian hita maradopkon angka keluarga, dongan manang sanga ise pe.

By: Pdt. Tumpal H. Lubis, STh

E_mail: mhonank@yahoo.com

Phone: 081362217848

YOHANES 2:1-10

Tidak ada komentar:

Posting Komentar